HAFRAGRAUTUR

Ég er mjög mikið fyrir hafragraut, og byrja flesta morgna á því að fá mér hafragraut, ýmist eldaðan eða kaldan/óeldaðan. Hafragrauturinn er hins vegar ekkert svakalega spennandi svona einn og sér, og því geri ég vanalega nokkrar útfærslur af honum til tilbreytingar. Það eru endalausir möguleikar til að bragðbæta grautinn, ávextir og ber eru afar hentug út í, og svo er gott að bæta við hnetum, möndlum, fræjum eða kókosflögum. Margir nota ýmist ofurfæði út á grautinn sinn, t.d. kakónibbur, bee pollen eða gojiber. Endalausir möguleikar - sem þýðir að enginn morgunn þarf að vera eins!

Hafragrautur með chia fræjum

Ég set 1 dl grófa hafra, 1 msk chia fræ og 2 dl vatn í pott og læt suðuna koma upp, hræri vel í á meðan.

Epla- & kanilgrautur

Set rúsínur í pottinn og leyfi þeim að hitna í grautnum. Flysja 1/2 epli (eða 1 lítið) og sker í litla bita. Dreifi yfir grautinn, ásamt kanil og möndluflögum.

Bláberjagrautur

Ég nota alltaf frosin bláber, tek út ca 1/2 bolla áður en ég græja grautinn. Þegar grauturinn er tilbúinn set ég örlítið af agave sírópi út í hann, hræri og bæti svo bláberjunum út í. Þar sem grauturinn er heitur þá afþýðast berin fljótt. Stundum strái ég einnig kanil og möndluflögum út á.

Banana & hnetusmjörsgrautur

Set 2 tsk af lífrænu hnetusmjöri út í heitann grautinn og hræri vel. Stappa svo 1/2 banana (eða 1 lítinn) og blanda út í. Þessi er guðdómlega góður!

Súkkulaði næturgrautur

Ef ég veit að ég mun ekki hafa tíma til að elda hafragraut um morguninn þá geri ég stundum næturgraut. Þá set ég 1 dl af grófum höfrum í krukku, ásamt 1 msk chia fræ og 2 dl möndlumjólk. Set einnig 1/2 tsk vanilludropa, 1 tsk kakóduft og nokkra dropa af stevíu með súkkulaðibragði. Öllu blandað saman og sett í ísskáp yfir nótt. Strái svo möndluflögum yfir um morguninn.